Ónæmismeðferð veitir ný vopn gegn krabbameini

Greinin birtist fyrst á vefsíðu Lifandi Vísindi og fékk Bleikt góðfúslegt leyfi til að birta hana með lesendum.


Vísindamenn eru önnum kafnir við að þróa nýja meðferð sem örvar ónæmiskerfi líkamans við að útrýma krabbafrumum, án þess að skaða heilbrigðar frumur. Ónæmismeðferð felur í sér nýja von um árangursríka meðferð gegn krabbameini og meðferðin er nærri því að opna okkur nýjar dyr.

Þetta var ósköp venjulegur dagur á síðasta áratugi liðinnar aldar. En fyrir doktorsnemann á rannsóknarstofunni hjá krabbameinsvarnastofnun í Kaupmannahöfn var hann undraverður. Mads Hald Andersen sá nokkuð sem alla krabbameinsfræðinga dreymir um: Krabbameinsfrumur voru horfnar eins og dögg fyrir sólu. Þennan dag á rannsóknarstofunni fékk hann fyrstu innsýn í nokkuð sem gæti orðið að krabbameinsbóluefni í meðferðarskyni. Hann hafði fundið einn af hornsteinunum í bóluefni sem örvar sjálft ónæmiskerfið í að ráða niðurlögum krabbameins. Og hann gerði sér fulla grein fyrir möguleikunum.

Danski vísindamaðurinn Mads H. Andersen varð heimsfrægur þegar hann sannaði hvernig sum prótín má nota í bóluefni gegn krabbameini.

„Uppgötvunin hefur mótað allan minn rannsóknarferil,“ segir Mads Hald Andersen sem er nú doktor og vinnur við krabbameinsrannsóknir hjá Center for Cancer Immune Therapy við Herlev Hospital í Kaupmannahöfn.

Á rannsóknarstofunni hafði Mads Andersen einangrað ónæmisfrumur, svonefndar drápara T-frumur, úr blóði krabbameinssjúklings. T-frumurnar gegna alla jafnan meginhlutverki þegar ónæmiskerfið þarf að ryðja sýkingum úr vegi. Hann blandaði T-frumunum saman við brot úr prótíni, survivin, sem hjálpar krabbameinsfrumum við að lifa af. Survivin er nánast aldrei að finna í heilbrigðum frumum en krabbameinsfrumurnar geta ekki lifað án þess. Honum til mikillar furðu tóku T-frumurnar að seyta úr sér boðefnum og fjölga sér með undraverðum hraða, rétt eins og þegar þær uppgötva framandi örveru. Skýringin gat einungis verið sú að T-frumurnar litu á prótínið sem hættulegan aðskotahlut og fjölguðu sér skjótt í heilan her til að berjast gegn þessum óvini.

Gat raunin virkilega verið sú að hann stæði með lykilinn að ónæmiskerfi líkamans til að ráðast á og útrýma krabbameinsfrumum? Væri það tilfellið mætti vinna að algerlega nýrri gerð meðferðar á krabbameini. Yfirspenntur blandaði hann drápara T-frumum við æxlisfrumur frá brjóstakrabbasjúklingum. Og í petriskálinni sá hann hvernig T-frumurnar réðust á krabbameinsfrumurnar og útrýmdu þeim hverri á fætur annarri.

Frá því að þessi stórbrotni árangur átti sér stað hafa miklar rannsóknir farið fram á hundruðum annarra mótefnisvaka í krabbameinsfrumum. Í ljós hefur komið að ónæmiskerfið gæti reynst langheppilegast við að leysa eitt af helstu vandamálum krabbameinslækninga: Hvernig unnt sé að greina krabbameinsfrumur, sem eru jú myndaðar af eigin frumum líkamans, frá heilbrigðum frumum.

Vandamálið við hefðbundna lyfjameðferð er hversu ómarkviss hún getur verið. Skilvirkir krabbafrumudráparar eins og t.d. taxol ráðast gegn óheftri fjölgun krabbameinfrumna. En meðal um 200 frumugerða líkamans er einnig að finna heilbrigðar frumur sem skipta sér skjótt. T.d. í þörmum, hári og blóði. Og þær verða illa úti. Þess vegna hefur lyfjameðferð alvarlegar aukaverkanir sem menn þola einungis í takmarkaðan tíma og skömmtum.

En með aukinni þekkingu innan líftæknifræði má greina krabbameinsfrumur og nú ræður mestu að finna aðferðir til að ráða niðurlögum þeirra. Það er á þessu sviði sem ónæmiskerfið kemur inn í myndina. Ónæmiskerfið hefur um ármilljónir þróast í að standast stöðugt áhlaup ósýnilegra örvera með því að greina skaðlegar framandi verur í sífellu. Þegar ónæmisfrumur rekast á framandi sameindir innan um heilbrigðar frumur fer af stað mikil atburðarrás. Á endanum er ráðist gegn óvininum á öllum vígstöðvum til að ráða bug á sýkingum af völdum veira og baktería, og ekki skirrst við að fórna eigin frumum líkamans ef veirur dyljast í þeim. Í kjölfarið man ónæmiskerfið eftir sýkingum og er undirbúið verði maður fyrir smiti á ný – jafnvel áratugum síðar. Það er þessi staðreynd sem menn nýta sér með hefðbundnum bólusetningum og draumurinn er nú um að geta upplýst ónæmiskerfið um að krabbameinsfruma sé óvinveitt fruma sem beri að útrýma.

Sjálfkrafa bati vísar veginn

Í ríflega öld hafa birst í vísindatímaritum athyglisverðar sögur um fólk sem á undraverðan máta nær fullum bata eftir krabbamein. Eitt elsta dæmið er frá 1912 þegar ítölsk kona með leghálskrabba náði umtalsverðum bata eftir að hafa fengið bólusetningu gegn hundaæði. Hún hafði verið bitin af sýktum hundi og kannski réðu bólusetningarviðbrögð ónæmiskerfisins niðurlögum æxlisins.

Síðan þá hafa sambærilegar frásagnir um sjálfkrafa bata komið reglulega fram. Nýlega kom t.d. fram lýsing í bandaríska tímaritinu Fordes á fjölda manns sem lifir enn þrátt fyrir að læknar hafi fyrir löngu talið batahorfur hverfandi. Einn þeirra er bandaríski smiðurinn Charles Burrows sem var kominn með svo illskeyttan lifrarkrabba að læknar kváðu hann eiga fáeina mánuði ólifaða. Charles Burrows sagði starfi sínu lausu og gekk um sem í þoku næstu tvo mánuði. En í febrúar 2006 bólgnaði magi hans skyndilega upp, hann fékk mikla ógleði og skalf af kulda. Þegar bráði af honum gátu læknar staðfest sér til mikillar furðu að æxlið var horfið.

Annað dæmi um sjálfkrafa bata sem var lýst í Forbes varðar hinn 69 ára gamla Dana Ole Nielsen Schou. Átján mánuðum eftir að hann hafði farið í skurðaðgerð vegna húðkrabbameins hafði krabbinn dreifst í lifur, maga, bein og heila. Á Ríkissjúkrahúsinu í Kaupmannahöfn gátu læknar ekkert aðhafst. En Ole Nielsen Schou gafst ekki upp. Hann hætti að reykja, hellti sér út í óhefðbundnar lækningar og gleypti í sig 17 mismunandi vítamín og steinefni. Hann prófaði heilun og ímyndaði sér meinvörpin sem rottur sem hann skaut niður rétt eins og í tölvuleik. Fjórum mánuðum síðar var Ole Nielsen Schou enn í fullu fjöri og við skönnun kom í ljós að 90% af æxlunum höfðu skroppið saman. Skömmu síðar hurfu þau alveg og fimm árum seinna, árið 2008, lýstu danski læknirinn dr. Louise Vennegaard Kalialis og samstarfsfélagar hennar þessum sjálfkrafa bata Ole Nielsen Schou í tímaritinu Melanoma Research.

Viðlíka bati er læknum fullkomin ráðgáta, en þeir benda á að samverkandi áhrif þessa nýja heilsusamlega matarræðis hafi kannski „styrkt“ ónæmiskerfið og þannig varnir sjúklingsins gegn meinvörpunum. Engar sannanir eru fyrirliggjandi en nokkur vísbending fólst í að ónæmisfrumur var að finna í þeim æxlum sem ekki var unnt að skera burt.

Mörg bóluefni í deiglunni

Vonir standa til að ná megi sömu undraverðu áhrifum með ónæmismeðferð. Þó er enn langt í land að mati Mads Hald Andersen. Það var árið 1999 sem Survivin varð heimsfrægt og síðan hafa bóluefni gegn krabba farið í gegnum heljarinnar rússíbanaferð, allt frá mikilli hrifningu í brostnar vonir hjá lyfjafyrirtækjum, sem hafa tapað miklu fé þegar árangurinn lét á sér standa í stórum klínískum rannsóknum.

Nú á dögum ríkir þó meiri bjartsýni og Mads Hald Andersen fer í fararbroddi meðal fremstu vísindamanna heims sem trúa á gríðarlega möguleika ónæmiskerfisins í sambland við þær meðferðir sem læknar búa þegar yfir.

„Ég er nokkuð viss um að krabbabóluefni eru væntanleg. Það er ekki lengur spurning um hvort það verður, heldur hvenær. Fyrstu slík eru rétt að öðlast viðurkenningu og þá liggur leiðin upp á við,“ segir Mads Hald Andersen.

Hann vísar til þess að á heimsvísu eru meira en 50 krabbabóluefni í III fasa sem er síðasta þrepið fyrir viðurkenningu. Survivin er um þessar mundir í fyrsta fasa af tilraunum.

Krabbi getur stýrt ónæmiskerfinu

Meðal vísindamanna um heim allan eru uppi margar ráðagerðir sem eiga það sameiginlegt að með nýrri þekkingu á ónæmiskerfinu er leitast við að örva eigin varnir líkamans til að útrýma krabbafrumum.

Ein einfaldasta baráttuaðferðin er að veita mikilvægustu frumum ónæmiskerfisins, T-frumunum og B-frumunum, örvun með eigin boðsameindum líkamans, svonefndu cytokin. Á þessu sviði hafa vísindamenn m.a. náð árangri með efninu Interleukin 2 sem er nánast eina lyfið sem verkar á sortuæxli. Önnur hernaðaraðgerð sem hefur lofað góðu á síðustu árum varðar svonefnd einstofna (e.monoclonal) mótefni. Einstofna mótefni er prótín sem sérhæfist í að bera kennsl á og tengjast öðru tilteknu prótíni.

Fleiri mótefni hafa öðlast viðurkenningu í krabbameinsmeðferð og er Herceptin gegn brjóstakrabba líklega þekktast þeirra. Herceptin tengist HER 2-viðtaka á yfirborði á sumum gerðum brjóstakrabbameins. Það leysir úr læðingi ónæmisviðbrögð sem fær stórætur til að éta merktar frumur og jafnframt örvar það vessabundna ónæmiskerfið. Vessabundna ónæmiskerfið gegnumborar krabbameinsfrumurnar svo segja má að þeim blæði út.

Með ennþá þróaðri aðferðum leitast vísindamenn við að vekja mikilvægar frumur í ónæmiskerfinu sem geta virkjað umfangsmikil ónæmisviðbrögð, sérstaklega gegn krabbameinsfrumum. Sumir reiða sig á að vekja ónæmiskerfið með prótínbútum sem er sprautað í sjúklingana en þetta geta einnig verið heil prótín. Aðrir reiða sig á að rækta frumur ónæmisvarnanna á rannsóknarstofu í miklu magni, sem má síðar sprauta aftur í sjúklinginn.

Kjarninn í þessu eru mótefnisvakar á æxlisfrumunum sem ónæmiskerfið getur borið kennsl á. Á þessu sviði gegnir hópur blóðfrumna er nefnast angafrumur mikilvægu hlutverki. Angafrumurnar sækja prótín út í krabbavefinn, halda síðan í eitlana og kynna þessi prótín fyrir óþroskuðum T- og B-frumum. Angafrumurnar framleiða auk þess cytokin sem örvar og styrkir ónæmisviðbrögð frumnanna. Hinar virku T-frumur skipta sér í heilann her af m.a. drápara T-frumum sem berast með blóðinu til æxlisins og drepa krabbameinsfrumur sem hafa þennan sérstaka próteinbút. Þegar margar æxlisfrumur eru drepnar taka angafrumurnar meira prótín af þeim og örva með því fleiri óþroskaðar T-frumur í eitlunum.

Útbreidd aðferð hefur löngum falist í að sækja óþroskar angafrumur er nefnast átfrumur (e. monocytes) úr krabbameinssjúklingunum og rækta mikinn fjölda þeirra á rannsóknarstofu. Þar næst eru þær forritaðar með mótefnisvaka eins og t.d. surivin eða heilum krabbameinsfrumum og sprautað aftur í sjúklinginn þar sem þær geta framkallað afmarkað ónæmisviðbragð gegn krabbameininu.

Fræðilega er þetta hrein snilld. En því miður hefur árangurinn valdið nokkrum vonbrigðum, því í ljós hefur komið að hvort tveggja ónæmiskerfið og krabbamein eru flóknari en í fyrstu var talið. T.d. eru krabbameinsfrumur erfðafræðilega óstöðugar og ef einungis ein fruma stökkbreytist þannig að hún glati mótefnisvakanum verður hún ósýnileg ónæmiskerfinu. Ónæmisfrumurnar eru heldur ekki jafn árásargjarnar og vonir stóðu til en það kann að stafa af því að krabbameinsfrumurnar þyki ekki nægjanlega framandi. Vísindamenn eru fullvissir um að gagngert ónæmisviðbragð feli í sér nokkur þrep og krefjist meiri örvunar en felst í stökum mótefnisvaka til að öðlast fullan styrk. Að líkindum er að finna einhvern mikilvægan stýribúnað sem verndar okkur gegn því að ónæmisvarnir ráðist á eigin frumur líkamans. Í nýju bólefni gegn krabbameini hafa vísindamenn því oft bætt fleiri örvandi boðefnum saman við mótefnisvaka, t.d. þrjár sameindir í einum pakka er nefnist TRICOM.

Fræðimenn hafa uppgötvað að einnig krabbameinsfrumur geta haft áhrif á og dregið úr krafti ónæmisviðbragða. T.d. getur krabbameinsfruma stökkbreyst og tekið skyndilega að seyta miklu af efnahvata, IDO, sem fjarlægir tiltekna amínósýru úr nágrenni frumnanna. Ónæmisfrumurnar þurfa nauðsynlega á þessari amínósýru að halda og stöðvast því þegar þær koma nálægt æxlinu.

Einnig hefur komið í ljós að ónæmisfrumurnar eru ekki einungis vígafrumur og t.d. er að finna T-frumur hvers hlutverk felst í að dempa ónæmisviðbrögð. Slíkar T-frumur hafa því eins konar neitunarvald gagnvart drápara T-frumum og sumar krabbameinsfrumur geta laðað til sín þessar dempandi T-frumur og þannig hrundið atlögunni. Frekari skilningur á slíkum T-frumum er framarlega á verkefnalista fræðimanna í rannsóknum og getur vonandi gefið af sér efni sem getur stöðvað þessa virkni og má gefa með bóluefni.

Allt þetta hefur orðið til að draga nokkuð úr væntingum manna og nú á dögum binda menn vonir við að bóluefni gegn krabbameini megi gefa sem viðbót við hefðbundnari meðferðir. Svo virðist sem krabbameinið og ónæmiskerfið finni eins konar jafnvægi og mestu skiptir að bæta réttum lóðum á vogarskálar ónæmiskerfisins.

Lyfjameðferð styrkir bóluefni gegn krabba

En stöðugt eru að koma fram nýjar meðferðir. Ein sem miklar vonir eru bundnar við er runnin undan rifjum eins forkólfs krabbameinsrannsókna, Stephen A. Rosenberg við National Cancer Institute í Bethedsa í BNA.

Rannsóknir hans varða nýjustu gerð ónæmismeðferðar – sem er einnig lengst frá því að verða viðtekin meðferð á sjúkrahúsum – er nefna má frumufærslu (e. cell transfer). Þetta er tæknilega afar krefjandi meðferð þar sem teknar eru T-frumur beint úr æxli sjúklingsins. T-frumurnar bera kennsl á váboða í æxlinu og hugmynd Stephen A. Rosenbergs er rétt eins og með angafrumurnar, að rækta þær í miklu magni og sprauta þeim síðan aftur í sjúklinginn. Þetta er líka snjöll hugmynd, en meðferðin hafði nánast engin áhrif á sjúklinga í tilraunum. En þegar þeir fengu lyfjameðferð fyrir ónæmismeðferðina gat Stephen A. Rosenberg staðfest mikla rýrnun í krabbameininu hjá um 70% sjúklinga.

„Rosenberg hefur uppgötvað eitthvað sem tekur fram öðrum ónæmismeðferðum fram til þessa,“ segir Mads Hald Andersen.

Fyrir fáeinum árum var algjörlega ókleift að reyna ónæmismeðferð eftir lyfjameðferð, þar sem hún drepur ónæmisfrumurnar. En niðurstöður Stephen A. Rosenbergs sýna að þetta getur verið góð hugmynd. Fræðimenn telja að á einhvern máta hljóti að vera takmörk fyrir því hve margar T-frumur geti verið í líkamanum og að lyfjameðferðin ryðji brautina fyrir nýjar T-frumur. Önnur áhrif gætu falist í að dempandi T-frumur virðast viðkvæmari gagnvart kemískri meðferð en aðrar T-frumur. Þess vegna séu ekki jafn margar frumur til að hamla ónæmisviðbragðinu.

Niðurstöður rannsókna Stephen A. Rosenbergs geta öðlast frekara vægi í framtíðinni varðandi það hvernig læknar nýta sér önnur bóluefni gegn krabba – snemma eða seint í meðferðarferlinu – allt eftir því hvaða meðferðarúrræði eiga í hlut.

Ónæmismeðferð lengir lífið

Enn er margt á huldu varðandi lífeðlisfræði krabbameina og ónæmiskerfisins. En nú þegar fyrstu bóluefnin gegn krabba fara senn að öðlast viðurkenningu bendir margt til að árið 2009 valdi straumhvörfum í þessum efnum. Þegar fyrstu bóluefnin öðlast samþykki bandarískra heilbrigðisyfirvalda verður það upphafið að nýju tímaskeiði þar sem horfið verður frá fremur ónákvæmum aðgerðum fortíðar gegn krabba, en þess í stað munu læknar nýta sér eitt sérhæft vopn hverju sinni þar til þeir hafa kannað alla möguleika.

Í framtíðinni munu læknar geta veitt mun einstaklingsbundnari meðferð þar sem þeir aðlaga innbyrðis skurðaðgerðir, geislameðferð, lyfjameðferð og ónæmismeðferð. Auk þess vopnast þeir miklum fjölda af efnum sem geta örvað og hnitmiðað ónæmiskerfið með skilvirkari hætti en til þessa. Því munu sífellt fleiri lifa af krabbamein, rétt eins og Charles Burrows og Ole Nielsen Schou, rætist vonir manna um möguleika á bóluefni gegn krabba.

Fræðilega ættu slík bóluefni í meðferðarskyni að verða mikill liðstyrkur í baráttunni gegn öllum krabbameinum, þar sem krabbameinin hafa sömu grunneiginleika: sérstök prótín sem ónæmiskerfið getur borið kennsl á. Og þrátt fyrir að ónæmismeðferð veiti ekki neinn kraftaverkabata munu krabbameinssjúklingar lifa lengur.


Hér getur þú lesið fleiri greinar á Lifandi Vísindi.

Kaia Gerber hannar tískulínu í samstarfi við Karl Lagerfeld

Í hörðum heimi tískubransans þá er ljóst að fyrirsætur þurfa að gera eitthvað sérstakt til að skara fram úr fjöldanum. Að hanna tískulínu í samstarfi við þekktan hönnuð telst klárlega eitt af því. Kaia Gerber hefur tilkynnt að hún er að hanna línu í samstarfi við engan annan en Karl Lagerfeld. Fyrirsætan kom fram í fyrsta sinn á tískusýningarpöllunum síðastliðið haust og vakti bæði athygli og aðdáun. Fatalína hennar mun koma í verslanir í september næstkomandi. Hin 16 ára gamla Kaia hefur þegar komið fram í tveimur tískusýningum fyrir Chanel og opnaði hún þá fyrri, sem þykir mikill heiður fyrir… Lesa meira

Myndband: Frábær aðferð til að passa förðunina þegar þú borðar

Hefurðu lent í því að vera búin að farða þig óaðfinnanlega, fara síðan út að borða og/eða drekka og eiga þá í vandræðum og jafnvel eyðileggja förðunina sem þú hafðir mikið fyrir? Engar áhyggjur, daman í myndbandinu kennir þér frábæra aðferð til að nærast og á sama tíma halda förðuninni fullkominni! https://www.facebook.com/RussianFashionblogger/videos/1899915476703926/   Lesa meira

Sjónvarpsmynd í vinnslu um samband Harry og Meghan

Aðdáendur Harry Bretaprins og Meghan Markle geta glaðst yfir nýjustu fréttum, en Lifetime mun vera að vinna að sjónvarpsmynd um ástir þeirra, sem ber titilinn Harry & Meghan: The Royal Love Story eða Harry og Meghan: Konungleg ástarsaga. Myndin mun fjalla um samband þeirra og ástarsögu allt frá því að sameiginlegur vinur kynnti þau þar til þau trúlofuðu sig í nóvember 2017. Myndin mun einnig skoða líf Meghan sem fráskilin bandarísk leikkona. Prufur standa yfir í hlutverk myndarinnar og enginn sýningardagur hefur verið gefinn upp. Lifetime sýndi hinsvegar myndina William & Kate: The Movie 11 dögum áður en þau giftu… Lesa meira

Ragga nagli: „Sit mjög oft ein eftir að borða“

Ragga Nagli er klínískur heilsusálfræðingur og einkaþjálfari. Í nýjasta tölublaði MAN er viðtal við hana um mataræði, hreyfingu, bætiefni, sem og bestu fötin og tækin í ræktina. Ragga fjallar þar meðal annars um hvernig mataræðið og máltíðir hafa breyst hjá henni: Það má segja Hvað, Hvernig, Hversu oft og Hversu mikið ég borða hafi breyst. Ég var mjög brennd af allskonar boðum og bönnum mjög lengi. Fékk skilaboð um að borða ekki brauð, lamb, svín, maís, banana, og fleira rugl. Nú borða ég allt sem að kjafti kemur og mér finnst gómsætt. Máltíðamynstrið hefur breyst hjá mér. Á einhverju matarplani átti ég að… Lesa meira

Myndband: Carrie Underwood og Ludacris syngja lag Super Bowl í ár

Carrie Underwood og Ludacris taka röddum saman í laginu The Champion sem er upphafslag útsendingar NBC sjónvarpsstöðvarinnar frá Super Bowl LII eða Ofurskálinni. Lagið mun einnig vera notað í umfjöllun stöðvarinnar um Vetrarolympíuleikana. Lagið er samið af Underwood og Ludacris ásamt Brett James og Chris DeStefano og er ansi grípandi, en þó ólíkt þeim lögum sem maður hefur heyrt hingað til frá Underwood. https://www.youtube.com/watch?v=Htu3va7yDMg Super Bowl fer fram 4. febrúar næstkomandi og auk stjarnanna á vellinum, þá munu stjörnur líka skemmta áhorfendum, Pink mun syngja þjóðsönginn og Justin Timberlake mun sjá um hálfleikssýninguna. Underwood er óðum að ná sér eftir… Lesa meira

Myndband: Ný Harry Potter mynd „um þann sem við nefnum ekki á nafn“ er komin út

Sjö mánuðum eftir að Warner Bros gaf aðdáendum Harry Potter leyfi til að gera nýja mynd um þann sem við nefnum ekki á nafn, er myndin komin á netið. Í myndinni, Voldemort: Origins of the Heir, er sögð sama Grisha McLaggen, erfingja Gryffindor, sem leitar að Tom Riddle, sem hvarf eftir að erfingi Hufflepuff var myrtur. „Við veltum fyrir okkur: Hvað varð til þess að Tom Riddle varð Voldemort? Hvað gerðist á þessum árum og hvað gerðist í Hogwart þegar hann kom til baka? Það er margt ósagt,“ segir Gianmaria Pezzato leikstjóri myndarinnar. „Þetta er saga sem vð viljum segja:… Lesa meira

Uppskrift: Ómótstæðilegur prótein súkkulaðibúðingur Hönnu Þóru

Hanna Þóra er 29 ára Hafnfirðingur sem hefur brennandi áhuga á veisluskreytingum, bakstri og dúlleríi. Hún er líka snyrtifræðingur og viðskiptafræðingur, flugfreyja, i sambúð og tveggja barna móðir. Hanna Þóra er ein af þeim sem er með síðuna Fagurkerar.is. Hér útbýr hún prótein súkkulaðibúðing, sem er tilvalinn til að halda sykurpúkanum frá, sérstaklega núna í janúar. Uppskriftin Hálfur desilítri chia fræ Ein skeið súkkulaðipróftein 1-2 dl Mjólk  (Möndlu,kasjú,soya eða venjuleg allt eftir smekk) Ég nota double rich chocolate sem ég keypti í prótín.is sem er í síðumúla og er einnig með vefverslun www.protin.is Við höfum keypt þetta prótein í tæp… Lesa meira

Myndband: Lærðu að brjóta þvottinn á nýjan hátt og sparaðu pláss

Það er eitt sem yfirgefur okkur aldrei, sama hversu heitt við viljum það: þvottahrúgan. Í meðfylgjandi myndbandi eru kennar sex aðferðir til að brjóta þvottinn saman sem eiga það sameiginlegt að spara pláss í skápnum, myndbandið lofar líka að maður spari tíma með þessu. Ég ætla að prófa næst þegar ég ræðst á þvottafjallið. https://www.facebook.com/FirstMediaBlossom/videos/10155894084094586/ Lesa meira

Kim Kardashian er með rándýrar ruslatunnur

Kim Kardashian hendir sko ruslinu með stæl, en hún er með ruslatunnur frá engum öðrum en tískuhönnuðinum Louis Vuitton. Af því að þegar maður er metinn á 220 milljónir dollara þá veit maður ekkert hvað maður á að eyða aurunum í, er það nokkuð? Fylgjendum hennar á Instagram sýndist sitt hvað um tunnurnar þegar Kim póstaði mynd af þeim. Nefndi einn þeirra að þær kostuðu meira en húsið hans. Ekki er vitað hvað tunnurnar kostuðu Kim, en sú minni kostar allavega um 3000 dollara á Ebay eða um 300 þúsund íslenskar krónur. Lesa meira

Myndband: Snemma beygist krókurinn

Krútt dagsins í dag er ungabarnið sem gefur sjálfum Rocky lítið eftir, en barnið virðist búið að ná helstu æfingum boxarans. Ert þú búin/n að fara í ræktina í dag eða á leiðinni þangað eftir vinnu? https://www.facebook.com/nerdingoutloud/videos/484454691914052/ Lesa meira

Stjörnumerkin: Áramótaspá 2018 – Bogmaður

Anna Lóa Ólafsdóttir heldur úti Facebooksíðunni Hamingjuhornið, en það var stofnað árið 2011. Í Hamingjuhorninu eru fróðlegir og innihaldsríkir pistlar um þætti sem snúa að samskiptum, persónulegum áskorunum og lífsins leyndardómum. Og þar má finna áramótaspá fyrir stjörnumerkin. Hér er áramótaspáin fyrir Bogmanninn 22. nóvember - 21. desember. Bogmaður Kæri bogmaður, byrja á því að segja þér að spáin fyrir þig er mögnuð og 3 stór spil sem komu úr bunkanum. Til að byrja með þá skoða ég árið sem er að líða undir lok. Það mætti segja mér að þú hafir upplifað einhverja togstreitu á árinu og svörin sem þú… Lesa meira

Myndband: Fólk er frábært – Blanda af því besta frá 2017

Í meðfylgjandi myndbandi sem er af Facebook síðunni People are awesome má finna blöndu af því besta frá árinu 2017. Fólk í hinum ýmsu íþróttagreinum af framkvæma ótrúlegustu hluti sem margir virðast ögra þyngdarlögmálinu all verulega. Ísland á meira að segja fulltrúa. https://www.facebook.com/peopleareawesome/videos/1542174665831706/ Facebooksíða People are awesome. Lesa meira